MIRADI YENYE THAMANI YA SHILINGI BILIONI 1.6 IMEKAGULIWA NA MWENGE WA UHURU 2023 WILAYA YA MISSENYI.

Posted on: August 11th, 2023

Leo tarehe 11 Agosti,2023 jumla ya Miradi ya maendeleo 07 yenye thamani ya shilingi bilioni 1.6 katika Halmashauri ya Wilaya ya Missenyi imemulikwa na Mbio za Mwenge wa Uhuru 2023.

Akitoa taarifa kwa kiongozi wa mbio za Mwenge wa Uhuru Mwenge wa uhuru utakimbizwa kilomita 167 katika Halmashauri ya Wilaya ya Missenyi na kufanya shughuli mbalimbali ikiwa ni pamoja na kukagua, kuzindua, kuweka mawe ya msingi pamoja na kutembelea miradi mbalimbali.

''Miradi itakayotembelewa ni pamoja na Barabara ya lami km1.25 katika Kata Bwanjai yenye thamani ya shilingi Milioni 484.8, Mradi wa Maji wa Kata ya Kitobo wa RUWASA wenye thamani ya shilingi milioni 802.6, Kituo cha Afya cha St. Thereza -Kajunguti wenye thamani ya shilingi milioni 96.0 ambapo kati ya hizo shilingi milioni 3.9 kutoka katika michango ya Mwenge na Wahisani milioni 92.1, Mradi wa Uhifadhi wa Mazingira Katika Hospitali ya Wilaya ya Missenyi Kata ya Mushasha wenye thamani ya shilingi miloni 3.9, Mradi wa Ujenzi wa jengo la Abiria katika stendi ya Kyaka katika Kata ya Kyaka wenye thamani ya shilingi milioni 31.6, Mradi wa Vijana wa Kyaka Youth Construction and Technician katika kata ya Kyaka wenye thamani ya shilingi milioni 32 na Mradi wa ujenzi wa bweni la wanafunzi wenye Uhitaji Maalum pamoja na uzio katika Kata ya Kassambya katika Shule ya Msingi Bunazi na thamani ya mradi ni milioni 178.1 Alisema Kanali Sakulo.

Katika Mradi wa matengenezo ya barabara ya lami ya KAJAI-BWANJAI-BUYANGO yenye urefu wa kilomita 1.25 katika Kata Bwanjai yenye thamani ya zaidi ya shilingi milioni 484.8, Ujenzi huu unajumuisha kusafisha eneo la kazi, kuchonga na kushindilia barabara, ujenzi wa kalavati 08 za duara, vivuko 12 vya miguu, uwekaji wa tabaka 03 za changarawe na kushindilia, lami, ujenzi wa mitaro pamoja na uwekaji wa alama za barabarani.

Mradi huu umesaidia kupitika kwa kipindi chote cha mwaka, kupunguza gharama za matengenezo ya mara kwa mara pamoja na kuchochea shughuli za kiuchumi na kijamii.Ujenzi huu ulianza 25 Agosti, 2021 na kukamilika 15 Januari, 2022 na umetekelezwa na mkandarasi PETER MULIMA wa Bukoba kupitia fedha za mfuko wa jimbo ikiwa ni utekelezaji wa ahadi ya Mheshimiwa Rais wa Jamhuri ya muungano wa Tanzania Dk Samia Suluhu Hassan.

Mradi wa Maji katika Kata ya Kitobo wenye thamani zaidi ya shilingi milioni 802.6 uliopo katika Kata ya Kitobo katika Halmashauri ya Wilaya ya Missenyi. Mradi huu unahudumia wananchi 5,836 kutoka kaya 973 za vijiji vya Kitobo, Kijunja, Kashasha na Kyazi.

Mradi huu unajumuisha tenki la maji lenye ujazo wa lita 135,000, tenki dogo lenye ujazo wa lita 50,000, vituo 10 vya kuchotea Maji, Nyumba ya Mtambo 01, ulazaji wa Mabomba kwa 27.1km, Ujenzi wa ofisi 01, Ufungaji wa Tranfoma ya KVA 50 na Pampu 01 ya kusukuma maji. Mpaka sasa jumla ya kaya 102 na taasisi 07 zimeunganishiwa huduma ya maji na mradi umetatua changamoto ya kutumia muda mwingi na kutembea umbali mrefu kutafuta maji.

Mradi huu ulianza kujengwa tarehe 18/01/2022 na kukamilika 30/06/2023 na mkandarasi aitwaye LUTHER ENGENERING CO.LTD wa Mwanza kupitia fedha za Serikali Kuu.

Mradi wa Wodi ya Wagonjwa yenye thamani ya shilingi milioni 96 katika kituo cha Afya cha St. Therese - Kajunguti ambapo Michango ya Mwenge wa Uhuru ni shilingi milioni 3.9 na wahisani milioni 92.1.Ujenzi wa mradi huu ulianza mnamo 01/07/2022 na kukamilika 30/07/2023.

Mradi wa Uhifadhi Mazingira katika Hospitali ya Wilaya ya Missenyi iliopo katika Kijiji cha Bulembo katika Kata ya Mushasha wenye thamani ya shilingi milioni 3.9. Eneo hili limeandaliwa kwa ajili ya kuoandwa miti 8,000 ingawa mpaka sasa imepandwa miti 5,724 ikiwemo miti aina ya Paini na Miti ya Matunda kama vile Miembe na Miparachichi

Gharama za mradi huu ni kwa ajili ya ununuzi wa miche, maandalizi ya eneo, upandaji, umwagiliaji na usimamizi wa mradi, Lengo la mradi huu ni kwa ajili ya kutunza na kuhifadhi mazingira kama kauli mbiu ya Mwenge wa Uhuru 2023 isemavyo "Tunza Mazingira, Okoa vyanzo vya Maji kwa Ustawi wa Viumbe hai kwa Uchumi wa Taifa.

Mradi wa Ujenzi wa Jengo la Abiria katika Stendi ya Mabasi Kyaka liliopo katika Kata ya Kyaka wenye thamani ya shilingi milioni 31. 6, Ujenzi huu umetokana na Mapato ya ndani ya Halmashauri na ulianza kutekelezwa mnamo mwezi Septemba 2022 na kukamilika 03/03/2023 kwa lengo la kusaidia kuwakinga idadi ya watu 83 hadi 92 na mvua na jua wakati wa kusubiria usafiri au waanyabiashara wadogowadogo ndani ya stendi.

Mradi wa Vijana wa Kyaka Youth Construction and Technician (KYCT) kilichopo katika Kata ya Kyaka wenye thamani ya shilingi milioni 32. Kikunndi hiki kinajishughulisha na kufanya kazi za ufundi wa umeme kama vile kuweka miundombinu ya umeme kwenye nyumba binafsi na taasisi mbalimbali, kujenga njia za umeme vijijini na mjini , kutoa huduma ya usafiri wa pikipiki, magari, bajaji pamoja na uungaji wa vyuma(Kuchomelea).Kikundi kilianzishwa tarehe 06/09/2022 kikiwa na Mtaji wa shilingi Milioni 22 na baadae kilipata mkopo wa 04% kwa vijana utokanao na mapato ya ndani ya Halmashauri na kikundi.

Mradi wa ujenzi wa bweni la wanafunzi wenye Mahitaji maalum pamoja na uzio katika Shule ya Msingi Bunazi iliopo katika Kata ya Kassambya wenye thamani ya shilingi milioni 178.1, Gharama za ujenzi huu zimetokana na mapato ya ndani ya Halmashauri ni shilingi milioni 47, serikali kuu shilingi milioni 130 na jamii shilingi milioni1.1.Lengo la mradi ni kulaza wanafunzi wa kike 80 wenye mahitaji maalum ambao ulemavu wao hauwawezeshi kuhudhuria masomo kwa kwenda shuleni na kurudi nyumbani kila siku.

Ikumbukwe kwamba Mwenge wa uhuru 2023 utakesha katika eneo la uwanja wa Mashujaa na kwenda kukabidhiwa katika Halmashauri ya Wilaya ya Kyerwa 12 Agosti, 2023.