MAPATO YA NDANI: MILIONI 500 ZIMEKAMILISHA KITUO CHA AFYA KAKUNYU

Posted on: February 2nd, 2023

Mkuu wa Mkoa wa Kagera Mhe. Albert Chalamila ameendelea na ziara yake leo tarehe 02 Februari, 2023 katika wilaya ya Missenyi katika tarafa ya Missenyi kata ya Kakunyu.Akiwa katika Kata ya Kakunyu Mheshimiwa Mkuu wa Mkoa amefanya ziara na ametembelea barabara ya TARURA ya Kakunyu - Bugango yenye urefu wa kilomita 12.5 na Barabara ya TARURA ya Missenyi Ranch - Bugango yenye urefu wa kilomota 12 pamoja kutembelea eneo la mpaka wa Tanzania na Uganda katika kata ya Kakunyu katika eneo maarufu lijulikanalo kama jiwe namba 27.

Mhe. Chalamila ameweka jiwe la msingi katika kituo cha Afya cha Kakunyu kinachojengwa kupitia mapato ya ndani kilichopo tarafa ya Missenyi kata ya Kakunyu na kuzungumza na wanachi wa Kata ya Kakunyu

Mhe. Chalamila amesema kutokana na hatua nzuri ya ujenzi ulipofikia kwasasa nafanya ufuatiliaji ili tupate vifaa vya kuanzia angalau jengo moja lifungulie na kituo kianze kutoa huduma.

'Nawaagiza RUWASA kuhakikisha maji yanafika kwenye kituo hiki na TANESCO wahakikishe umeme unawaka kwenye kituo hiki' Alisema Mhe. Chalamila.

Kwa upande wa mwenyekiti wa Halmashauri ya wilaya ya Missenyi Mhe. Projestus Tegamaisho wakati akitoa ufafanuzi alisema Kata hii haikuwa na kituo cha Afya hivyo kupelekea wananchi kutembea umbali mrefu ili kupata huduma za Afya za ngazi ya kituo cha Afya na ndio maana Halmashauri ya Wilaya ya Missenyi baada ya kubaini changamoto hii kwa mwaka 2021/2022 ilitenga shilingi milioni 500 kutoka mapato ya ndani kwa ajili ya ujenzi wa Kituo cha Afya Kakunyu ili kuboresha huduma za afya.

Kituo hiki kinajengwa kwa jumla ya shilingi milioni 500 kutoka mapato ya ndani kwa ajili ya kujenga jumla ya majengo manne ambayo ni Jengo la Wagonjwa wa nje, Jengo la Maabara, Jengo la Wodi ya Wazazi, Jengo la kliniki ya Uzazi na Mtoto na serikali kuu imetoa shilingi milioni 90 kwa ajili ya ujenzi wa nyumba ya watumishi (3 in 1)

Kwa upande wake Diwani wa Kata ya Kakunyu Mhe. Richard Mbekomize alishukuru baraza la madiwa kwa kuridhia kiasi cha shilingi milioni 500 kupelekwa Kata ya Kakunyu pamoja kuishukuru Serikali ya awamu ya sita inayo ongozwa na Mheshimiwa Rais wa Jamhuri ya Muungano wa Tanzania Dk Samia Suluhu Hassan kwa kutoa shilingi milioni 90 kwa ajili ya ujenzi wa nyumba ya watumishi katika kituo hicho.

Kituo hiki kinatarajia kuhudumia jumla ya vijiji 4 na vitongoji 20 vyenye jumla ya wakazi wapatao 28,189 katika kata ya Kakunyu.