KAMPENI YA MSAADA WA KISHERIA YA MAMA SAMIA YAWAFIKIA WANANCHI WILAYANI MISSENYI

Posted on: April 15th, 2025

Leo Aprili 15, 2025 Kampeni ya Msaada wa Kisheria ya Mama Samia imeanza katika Wilaya ya Missenyi ambapo wananchi wamejitokeza katika viwanja vya Igayaza Kata ya Nsunga na kuwasilisha kero zao kwa Wataalamu wa sheria.

Akizungumza na wananchi wa Kata ya Nsunga, Wilayani Missenyi mapema leo Waziri wa Katiba na Sheria Dkt. Damas Ndumbaro amewataka wananchi kuwasema wale wote wanaofanya uhalifu, ukiukaji wa sheria, dhuruma na ukatili wa kijinsia ili wachukuliwe hatua.

"Ndugu zangu pale kwenye uhalifu na ukiukaji wa sheria muda wa kusema ni sasa, wale ambao wanafanya ukatili wa kijinsia na wale ambao wanadhurumu wajane na wanyonge muda wakusema ni sasa ili washughulikiwe". Amesema Dkt. Dumbaro.

Aidha, ameongezea kuwa zoezi hilo litakuwa endelevu kupitia Afisa Dawati na Mratibu wa Kampeni ya Huduma za Kisheria wa Halmashauri ya Wilaya ya Missenyi ili kusikiliza kero na changamoto za Kisheria zinazowakabili wananchi hata baada ya siku tisa zilizotengwa katika Wilaya ya Missenyi kuisha.

Pia amesisitiza kuwa kupitia msaada wa Kisheria haki, usawa na amani katika jamii vitapatikana hivyo kuwa chachu ya maendeleo.

Naye Mbunge wa Jimbo la Nkenge Mhe. Florent Kyombo amesema kuwa uwepo wa Kampeni hii ni fursa kwa wananchi Wilayani Missenyi kutatua changamoto zao zinazowakabili, kwani baadhi ya wananchi kesi zao zimeshindwa kuendelea kutokana na kushindwa kumudu gharama za kuwalipa Mawakili.

Kwa upande wao wananchi waliojitikeza katika Viwanja vya Igayaza, Kata ya Nsunga Wilayani Missenyi wameipongeza Serikali kwa kuleta huduma za Kisheria karibu na maeneo yao, wakisema hatua hiyo itasaidia kutatua changamoto zao zinazohitaji msaada wa Kisheria.

Kampeni hii ya Msaada wa Kisheria ya Mama Samia imezinduliwa rasmi Mkoani Kagera Aprili 14, 2025 ambapo kwa Wilaya ya Missenyi imeanza rasmi leo Aprili 15.

Kampeni hiyo yenye Kauli mbiu isemayo "Msaada wa Kisheria kwa Haki, Usawa, Amani na Maendeleo" imelenga kuwafikia wananchi walioko pembezoni kwa kuwawezesha kupata haki zao kwa njia ya sheria.