Ndg. RAMADHANI KAILIMA: KAELIMISHENI JAMII JUU YA UMUHIMU WA KUJIANDIKISHA KATIKA DAFTARI LA KUDUMU LA WAPIGA KURA.

Posted on: June 15th, 2024

Tume Huru ya Taifa ya Uchaguzi leo Juni 15, 2024 imefanya mkutano na Maafisa Habari wa Mikoa na Halmashauri uliofanyika katika Ukumbi wa Mlimani City Jijini Dar es Salaam kwa ajili ya kuwataka kuwa mstari wa mbele katika kufanikisha zoezi la uboreshaji wa daftari la kudumu la wapiga kura litakalozinduliwa rasmi 01 Julai, 2024 na Waziri Mkuu wa Jamhuri ya Muungano wa Tanzania Mhe. Kassim Majaliwa Mkoani Kigoma.

Akiongea na Maafisa habari Mkurugenzi wa Uchaguzi Ndg. Ramadhani Kailima amewataka Maafisa Habari wa Serikali kuhakikisha wanaelimisha jamii kuhusu umuhimu wa kujiandikisha katika Daftari la Kudumu la Wapiga Kura  Awamu ya Kwanza ambapo zoezi hilo linalotarajiwa kuanza 01 Julai 2024.

"Ndugu Maafisa Habari, uboreshaji huu unahusu kila mwananchi mwenye sifa, Tumieni njia mbalimbali kuelimisha jamii umuhimu wa kujiandikisha katika daftari la kudumu la wapiga awamu ya kwanza" Alisema Ndg. Ramadhani Kailima.

Akiwasilisha mada  kuhusu Uboreshaji wa Daftari la Kudumu la Wapiga Kura Awamu ya Kwanza Bi. Giveness Aswile ambaye ni Mkurugenzi wa Idara ya Habari na Elimu ya Mpiga Kura  amesema zoezi hilo la kuboresha Daftari la Kudumu la Mpiga litakapokamilika kwa awamu ya kwanza linatarajiwa kuwa na jumla ya wapiga kura 34,746,638 kutokana na Matokeo ya Sensa ya Watu na Makazi ya Mwaka 2022.

“Mwaka 2020 Daftari la Kudumu la Wapiga Kura lilikua na idadi ya watu 29,754,699  hivyo kwa sasa kuna ongezeko la wapiga kura wapya 5,586,433 sawa na asilimia 18.7”. Amesema Bi. Givennes

Ameongeza kuwa katika zoezi hilo wapiga kura 4,369,531 wanatarajiwa kuboresha taarifa zao na wapiga kura 594,494 wataondolewa katika Daftari kwa kupoteza sifa za kuwa wapiga kura na moja ya sababu ni pamoja na vifo.

Akizungumzia kuhusu mfumo mpya saidizi unaofahamika kama Online Voters Registration System, (OVRS) amesema mfumo huu utawawezesha  wapiga  kura walioandikishwa kipindi cha nyuma kuanzisha mchakato wa uboreshaji taarifa zao wenyewe kwa njia ya mtandao kupitia simu ya mkononi au Kompyuta kwa kubadilisha au kuhamisha  taarifa za mpiga kura kutoka Jimbo au Kata ya zamani kwenda kwenye eneo alipo sasa.