JIMBO LA NKENGE KUBADILISHWA JINA KUWA JIMBO LA MISSENYI

Posted on: March 11th, 2025

Kamati ya Ushauri ya Wilaya ya Missenyi (DCC) leo Machi 11, 2025 imejadili na kupitisha mapendekezo ya kubadili jina la Jimbo la uchaguzi kutoka Jimbo la Nkenge na kuitwa Jimbo la Missenyi.

Akimkaribisha Mwenyekiti wa Kikao ambae ni Mkuu wa Wilaya ya Missenyi Mhe. Kanali (Mst) Hamis Maiga kufungua kikao hicho Kaimu Mkurugenzi Mtendaji Halmashauri ya Wilaya ya Missenyi Bi. Tapita Tuvana amesema kwamba lengo la kikao hicho ni kuhakikisha Kamati ya Ushauri ya Wilaya inajadili pendekezo la kubadili jina la Jimbo la uchaguzi ili baada ya hapo kuwe na msimamo mmoja kama Wilaya.

Akiwasilisha taarifa ya mapendekezo ya kubadili jina la Jimbo la uchaguzi kutoka Jimbo la Nkenge na kuitwa Jimbo la Missenyi kwa niaba ya Kaimu Mkurugenzi Mtendaji, Afisa Utawala Halmashauri ya Wilaya ya Missenyi Bi. Catherine Peter amesema kwamba mnamo tarehe 26/02/2025 Tume huru ya Uchaguzi ya Taifa ilitoa tangazo kwa umma pamoja na barua ya maelezo ikihusu kuanza kwa mchakato wa kuchunguza na kugawa au kubadili majina ya majimbo ya uchaguzi Tanzania bara.

Kutokana na taarifa hiyo, tangazo liliwasilishwa katika mkutano wa Baraza la Madiwani wa tarehe 28/02/2025 ambapo Baraza lilichambua na kupendekeza kuwa jina la jimbo libadilike kutoka Jimbo la Nkenge na kuitwa Jimbo la Missenyi na hii ni kutokana na sababu mbalimbali.

Moja ya sababu hizi ni kutokuwepo kwa mfanano wa jina la Wilaya na Jimbo la uchaguzi hivyo kupelekea jina la Nkenge kutofahamika sana na kutotumika katika nyaraka mbalimbali za kimawasiliano baina ya serikali, chama na utendaji kazi wa kila siku.

Pili, jina Nkenge kutumika kwenye Tume huru ya Uchaguzi na uwakilishi wa Mbunge Bungeni hivyo kupelekea jina hili kutumika na muhimili mmoja wa dola ambao ni Bunge na kuacha mihimili mingine ikiwemo Mahakama na Serikali.

Aidha, Wajumbe wa Kamati wamepata nafasi ya kujadili na hatimaye kwa kauli moja wameridhia kupitisha jina la Missenyi kuwa jina la Jimbo la Uchaguzi na kuanza kutumika katika Uchaguzi Mkuu wa mwaka huu 2025.

Mwenyekiti wa Kikao ambaye ni Mkuu wa Wilaya ya Missenyi Mhe. Kanali (Mst) Hamis Maiga amehitimisha kikao hicho kwa kuwashukuru Wajumbe wote kwa ushiriki wao na kuwataka kuendelea kushirikiana na kuacha chuki na majungu.

Kikao hicho kimehudhuriwa na Viongozi wa ngazi mbalimbali kuanzia Vijiji, Kata, Halmashauri na ngazi ya wilaya ikiwa ni pamoja viongozi wawakilishi wa vyama vya siasa na madhebu ya dini mbalimbali.