Halmashauri yakusanya asilimia 98 ya mapato

Posted on: July 27th, 2017

Halmashauri ya Wilaya ya Missenyi, Mkoani Kagera imefanikiwa kukusanya asilimia 98 ya mapato kutoka katika vyanzo vyake mbalimbali vya ndani katika mwaka wa fedha 2016/2017 uliomalizika Juni 30 mwaka huu.

Katika mwaka huo wa fedha Halmashauri ya Wilaya ya Missenyi ilipanga kukusanya shilingi 1,630,203,000 kutoka katika vyanzo vyake vya ndani (own sources) ambapo mpaka mwisho wa mwaka huo makusanyo halisi ni 1,596,379,492.54 sawa na asilimia 98 ya makisio

Akizungumza katika Mkutano wa mwaka wa Baraza la Madiwani wa Halmashauri hii, Mwenyekiti wa Halmashauri   Projestus Tegamaisho aliwaambia wajumbe wa Baraza hilo kuwa, mafanikio hayo yametokana na uchapaji kazi wa watendaji na madiwani wa Halmashauri hii.

Katika Mkutano huo uliofanyika  katika ukumbi wa Halmashauri, Mheshimiwa Tegamaisho  aliwapongeza wote waliohusika kwa namna yeyote katika kufikia hatua hiyo huku akitoa wito kwa Ofisi ya Mkurugenzi na Madiwani wa kuimarishwa kwa juhudi zaidi katika ukusanyaji katika mwaka wa fedha 2017/2018.
"Mwaka mpya wa fedha umeshaanza hivyo Mkurugenzi na watendaji wako anzeni kukusanya kodi mapema na waheshimiwa madiwani tuongeze nguvu katika kusimamia vyanzo vya mapato katika maeneo yetu kama mnavyoelewa mwaka huu tumepenga kukusanya zaidi ya bilioni 1.9" alisema.

Aidha, katika mkutano huo ambao pamoja na mambo mengine uliweza kupokea na kujadili taarifa mbalimbali kama vile taarifa za utekelezaji na miradi ya maendeleo  kwa mwaka wa fedha 2016/207 na kupitisha mpango kazi wa Halmashauri kwa mwaka wa fedha 2017/2018.