HAKIKISHENI ZOEZI LA SENSA LINAKAMILIKA NDANI YA MUDA ULIOPANGWA

Posted on: August 26th, 2022

Mkurugenzi Mtendaji Halmashauri ya Wilaya ya Missenyi Ndg. Waziri Kombo amewataka wasimamizi wa zoezi la Sensa ya Watu na Makazi kuhakikisha zoezi linakamilika ndani ya muda uliopangwa.

Aliyasema hayo wakati akizungumza na wasimamizi wa sensa wa ngazi ya Wilaya, wasimamizi wa Maudhui ngazi ya Kata na Watendaji wa Kata leo ofisini kwake wakati wa kutathmini maendeleo ya zoezi la sensa ya watu na makazi  lililoanza tangu 23 Agosti 2022.

Aidha aliwasisitiza wasimamiza wa zoezi kuhakikisha wanawasimamia Makarani ipaswavyo kwa kuhakikisha kila kaya inahesabiwa kikamilifu, kuhakikisha makarani wanafika kazini mapema, kuhakikisha Makarani wanafikisha idadi ya kaya iliyopangwa kwa siku, kuhakikisha Vishikwambi vinakua na chaji muda wote wa zoezi pamoja na kuhakikisha kila eneo linafikiwa ndani ya muda uliopagwa kwani hakutakua na muda wala malipo ya nyongeza.

Msimamzi wa zoezi la sensa ya watu na makazi kutoka ngazi ya Taifa alisema zoezi linakwenda vizuri na kuna maeneo yaliyomalizika na Makarani wanahamishwa kwenda maeneo ambayo bado hayajakamilika.

Aliwashukuru Jeshi la polisi kwa kuonyesha ushirikiano katika usiku wa kuamkia 23 Agosti 2022 majira saa sita za usiku kwa kuwapatia makarani ushirikiano mkubwa wa ulinzi katika kuhakikisha yale makundi maalum yanahesabiwa kama ratiba ilivyokua imepangwa.

Alisisitiza kwamba hakuna sababau yeyote ya kutomaliza ndani ya muda kwani hata maeneo ambayo hayana umeme makarani tunawapatia vifaa vya kuhifadhi chaji.

Aidha watendaji wa Kata walielekezwa kuhakikisha wanasimamia na kufuatilia zoezi hili ipaswavyo na kutoa taarifa pale wanapo ona mambo hayaendi sawasawa kwani wao ndio waratibu wa zoezi hili katika kata zao.

Kwa upande wake Mratibu wa Sensa ya Watu na Makazi Wilaya ya Missenyi Ndg. Joachim Joseph Nyanda alisisitiza juu ya kama kutakua na changamoto yeyote itolewe taarifa mapema sana ili ipatiwe ufumbuzi mapema pamoja na kuwakumbusha wasimamizi kwamba kazi iliopangwa inapaswa kumalizika ndani ya muda uliopangwa na hakuna malipo ya ziada.

Dodoso la sensa ya watu na makazi linapaswa kumalizika ndani ya siku saba kisha tuingie kwenye dodoso la majengo linalotarajiwa kufanywa ndani ya siku mbili na zoezi linatarajiwa mpaka kufikia 31 Agosti liwe limekamilika na kwa kaya ambazo hazijafikiwa wanaombwa kuendelea kuwa na uvumilivu na kuandaa taarifa zao ili karani akifika kwenye kaya waweze kukamilisha kwa uharaka.