DC SAKULO: WEKENI KUMBUKUMBU YA WATAKAO LALA USIKU WA KUAMKIA 23 AGOSTI 2022.

Posted on: August 22nd, 2022

Mkuu wa Wilaya ya Missenyi Kanali Wilson Sakulo amewaongoza wananchi wa Wilaya ya Missenyi katika Matembezi ya Amani kwa ajili ya kuhamasisha wananchi kushiriki kwenye Sensa ya Watu na Makazi.

Matembezi hayo ya umbali wa takribani 05km yaliyofanyika katika Kata ya Kassambya kuanzia ofisi za TRA zilizopo kijiji Nyabihanga hadi Ofisi ya Kijiji Bunazi.

Akiongea na wananchi Kanali Sakulo baada ya kuhitimisha matembezi hayo, amewasihi wananchi kuhakikisha kwamba wanajitokeza kwa wingi ili kufanikisha zoezi hili muhimu kwa taifa letu.

“Dododso la kuhesabu watu litachukua siku zaidi ya moja hivyo inawezekana kaya zote zisifikiwe kwa siku moja, hivyo niwaombe wakuu wa kaya kuhakikisha wanaweka kumbukumbu ya watu wote watakao kua wamelala katika kaya husika usiku wa kuamkia 23 agosti 2022” Alisema Sakulo.

Kwa upande wa Mwenyekiti wa Halmashauri ya Wilaya ya Missenyi Mh. Projestus Tegamaisho amepongeza maandalizi yaliyofanyika katika Wilaya nzima ukilinganisha na sensa zingine zilizopita.

“Niwapongeze sana kwa maaandalizi mlioyafanya maana kila kona ya Wilaya hii ukipita hata mtoto mdogo anakueleza kuhusu sensa, hivyo niwatake wana Missenyi kujitokeza ili tutie fora kwenye zoezi hili” Alisema Tegamaisho.

Kaimu Mkurugenzi Mtendaji wa Halmashauri ya Wilaya ya Missenyi Mama Tapita Tuvana alimhakikishia Mkuu wa Wilaya kwamba atahakikisha maelekezo yote yaliyokuwa yakitolewa na yaliyotolewa atayatekeleza kwa weledi mkubwa ili kuweza kuhakikisha zoezi la sensa linafanikiwa.

Aidha Afisa mipango Wilaya ya Missenyi Bw. Julian Tarimo aliwataka Wenyeviti wa vitongoji kuhakikisha wanaambatana na Makarani katika kila kaya ili kama kuna changamoto yoyote inayoweza kujitokeza waweze kupata utatuzi wake haraka iwezekanavyo.

“Niwaombe wakuu wa kaya wasiwafiche walemavu kwani mipango ya serikali inahusisha walemavu na takwimu hizo ni muhimu kwa Taifa” Alisema Tarimo.

Matembezi haya yamefanyika kukiwa kumebakia masaa machache ili kufanyika kwa zoezi la kuhesabu watu linalotarajiwa kuanza usiku wa kuamkia 23 Agosti.

Siku ya jana tarehe 21 Agosti 2022 makarani walifanikisha kukagua mipaka ya maeneo ya kuhesabia watu pamoja na kujaza dodoso la jamii linalohusika na kujaza huduma za kijamii zinazopatikana katika eneo husika kisha usiku wa leo kuanzia saa sita na dakika moja litafuatia dodoso la makundi maalum, na asubuhi yake dodoso la sensa ya watu na makazi na mwisho kabisa siku zitakazofuatia litakuja dodoso la majengo.