DC MISSENYI: WANANCHI CHUKUENI TAHADHARI DHIDI YA UGONJWA WA EBOLA

Posted on: September 27th, 2022

Mkuu Wilaya ya Missenyi  Kanali Wilson Sakulo amewataka wananchi kuendelea kuchukua tahadhari dhidi ya ugonjwa wa Ebola ambao siku za hivi karirbuni umeripotiwa katika nchi jirani.

Ameyasema haya wakati akizungumza na waandishi wa habari ofisini kwake ambapo amesema mpaka sasa ugonjwa haujaingia nchini hivyo huu ndio wakati muafaka wa kuhakikisha tunachukua tahadhari za kujikinga na ugonjwa huu ikiwemo kuacha kupeana mikono, kunawa mikono mara kwa mara kama tulivyofanya kipindi cha CORONA.

“Tuendelee kusikiliza maelekezo yanayoendelea kutolewa na wataalam wa tiba katika Wilaya yetu ya Missenyi ikiwa ni pamoja na kuzingatia tahadhari zote zinazoendele kutolewa” Alisema Sakulo

Kwa upande wake Mkurugenzi Mtendaji Halmashauri ya Wilaya ya Missenyi Bw. Waziri Kombo amesema tayari tumeshatenga kituo cha Afya cha Kabyaile kilichopo Kata ya Ishozi Tarafa ya Kiziba kitakachotumika kama kituo maalum kwa ajili ya Wagonjwa wa Ebola kama watapatikana.

Aidha Mganga mkuu wa Wilaya ya Missenyi Dk. Daniel Chochole amesema kwamba idara ya afya wamejipanga vyema na wako tayari kujitoa kupambana na ugonjwa huo kama utaingia nchini na hawatarudi nyuma na tayari wameshaunda timu mbalimbali ili kuhakikisha wanafanya kazi kwa kushirikiana kwa kiwango cha hali ya juu.

“Tumepokea vifaa na wataalam mbalimbali kutoka wizara ya afya na wanaendelea na ufungaji wa vifaa hivyo na kwa sasa tunaomba kuongezewa vifaa vingine kama magari maalum kwa ajili ya kubebea wagonjwa wa magonjwa yanayoambukiza kwa haraka ambayo ni tofauti kidogo na haya tulionayo na pia ikumbukwe kwamba magari haya tulionayo yakishatumika kwenye zoezi hili hayataweza kutumika kwa wagonjwa wengine ambao sio wa Ebola." Alisema Chochole

Ikumbukwe kwamba Wilaya ya Missenyi ipo umbali wa kilomita 155 kutoka Wilaya ya Mubende katika nchini ya Uganda ambayo imekumbwa na mlipuko wa Ugonjwa huu.

Dalili za ugonjwa huu ni pamoja na kupata homa, maumivu ya misuli, kutapika, kuota vipele, kuharisha na kutokwa na damu hivyo pindi uonapo dalili hizi kwako au kwa mtu yeyote toa taarifa kwa viongozi wa karibu na maeneo uliopo au  kwa wataalamu wa afya waliopo karibu yako.