CHANGAMOTO ZA WAKULIMA WA MIWA MISSENYI ZAPATA UFUMBUZI

Posted on: September 13th, 2024

Leo Septemba 13, 2024 Mkuu wa Wilaya ya Missenyi  Mhe. Kanali (Mst) Hamis Maiga amefanya kikao na Uongozi wa Kiwanda cha Kagera Sugar na wawakilishi wa vyama vya ushirika vya wakulima wa Miwa katika Wilaya ya Missenyi kwa lengo la kutatua changamoto zinazo wakabili  Wakulima hao.

Akifungua kikao hicho Mkuu wa Wilaya ya Missenyi Mhe.Kanali (Mst) Hamis Maiga amewasihi wakulima wa miwa na kiwanda cha Kagera Sugar kupendana kwasababu wanategemeana.

"Wakulima wa miwa na Kagera Sugar maisha yenu yanategemeana, watu wanaotegemeana lazima wapendane mkipendana mtakuwa wamoja na hizi changamoto zilizopo itakuwa rahisi kuziondosha, kwahiyo nina imani suluhu itapatikana katika kikao hiki".

Aidha changamoto ambazo zimepatiwa ufumbuzi na kufikiwa makubaliano katika kikao hicho ni pamoja na; wakulima waendelee na utaratibu wa kuwa na wakataji wao na Kiwanda kitatoa wakataji 200 kwa kuanzia, AMCOS kupeleka tani 1,200 kwa siku sawa na tani 36,000 kwa mwezi, malipo ya Wakandarasi watalipwa baada ya siku 14 na malipo ya wakulima yatalipwa baada ya siku 60, kuhusu upimaji wa ubora wa miwa utafanyika kwa miwa ya ajali ya moto na mkulima atashirikishwa kwenda kuona namna wanavyopima na mwisho majibu yatatolewa kwa AMCOS kwa njia ya maandishi, kiwanda kitachukua miwa yote ya wakulima lakini wakulima wajitahidi miwa ifike ndani ya masaa 24 hadi 36, aidha, Kikao kimeadhimia kwamba ajali za moto zipimwe kisha  mkulima na viongozi wa AMCOS washirikishwe kuchukua miwa ili miwa iweze kufika kiwandani, na kuhusu mabadiliko ya mbegu mpya wakulima wapewe muda wa kumaliza mbegu ya zamani na elimu itolewe  kabla ya kuanza kulima mbegu mpya yenye matokeo mazuri na tija katika uzalishaji wa sukari.

Kwa upande wake Mwenyekiti wa Halmashauri ya Wilaya ya Missenyi Mhe. Projestus Tegamaisho amevitaka vyama vya ushirika kutafuta wataalamu wa uchumi na wanasheria ili wawafundishe na kuwasaidia wakulima wa miwa katika kusaini mikataba na namna bora ya kupata faida.

Kikao hicho kimefanyika katika ukumbi Mdogo wa Halmashauri ya Wilaya ya Missenyi na kuhudhuriwa na Mwenyekiti wa Halmashauri ya Wilaya ya Missenyi Mhe Projestus Tegamaisho, Mkurugenzi Mtendaji wa Halmashauri ya Wilaya ya Missenyi Bw. John Paul Wanga, Uongozi wa Kiwanda cha Kagera Sugar ukiwakilishwa na Bw. Sanjeev Mishra ambaye Mkurugenzi wa Kiwanda hicho na Viongozi mbalimbali wa Wilaya na vyama vya ushirika.