BILIONI 1.9 KUMTUA MAMA NDOO KICHWANI KATIKA KATA ZA KASHENYE, KANYIGO NA BWANJAI.

Posted on: February 12th, 2024

Mwenyekiti wa Kamati ya Fedha utawala na Mipango Mhe. Projestus Tegamaisho ameongoza kamati ya Fedha, Utawala na Mipango katika ukaguzi wa mradi wa Maji wa Kashenye, Kanyigo na Mugana unaojengwa na mkandarasi M/S EFQ COMPANY LTD kwa gharama za shilingi bilioni 1.9 kwa awamu ya kwanza.

Akitoa taarifa ya mradi Bw. Erick Audax kwaniaba ya Meneja wa RUWASA Missenyi alisema mradi huu unatarajia kihudumia jumla ya wananchi 23,219 wa kata zote tatu ambapo Kata ya Kashenye wananchi 5,786, Kanyigo wanachi 9,547 na Bwanjai wananchi 7,886.

Aidha Bw. Erick alibainisha kwamba kazi zilizo fanyika mpaka sasa pamoja na Ujenzi wa tenki lenye lita za ujazo laki 2 umefikia 85%, Ujenzi wa Sump tank lenye ujazo wa lita elfu 50 umefikia 90%, Ujenzi wa jengo la ofisi ya Jumuiya ya watoa huduma ya maji ngazi ya jamii (CBWSO) umefikia 55%, Ujenzi wa vituo 5 kati 12 vya kuchotea maji sawa na 42%, Ujenzi wa Nyumba ndogo moja ya mashine ya kusukumia maji umefikia 90%, Uchimbaji wa mitaro na ulazaji wa mabomba kilomita 11.7 umefikia 60% na kufunga transfomer ya 500KVA kutoka urefu wa 3.78km kutoka njia kuu ya barabara ya umeme umekamilika kwa 95%.

Kwa upande wake Mwenyekiti wa kamati aliipongeza serikali ya awamu ya sita inayoongozwa na Mheshimiwa Rais Dkt. Samia Suluhu Hassan kwa kuamua kuondoa kero ya ukosefu wa maji safi na salama katika tarafa ya Kiziba pamoja na kuwasihi uongozi wa Kata ya Kashenye wahakikishe wanawaelimisha wananchi juu ya mradi huu na manufaa yake ili waweze kuulinda na kuutunza kwa maslahi yao na Kata jirani zitakazonufaika na mradi huu.

"RUWASA hakikisheni mnamsimamia vizuri mkandarasi ili aweze kukamilisha mradi huu ndani ya muda alioongezewa kwani mradi huu ni tegemeo kwa wananchi wa maeneo haya na maeneo ya Kata jirani" Alisema Mheshimiwa Tegamaisho.

Ikumbukwe kwamba mradi huu ulitarajiwa kukamilika 25 Novemba, 2023 na mkandarasi ameongezewa muda wa miezi mitatu na mradi unatarajiwa kukamilika mnamo tarehe 25 Februari, 2024.