BARAZA LA MADIWANI MISSENYI LAENDELEA NA ZIARA YAKE KATIKA HALMASHAURI YA MJI WA TUNDUMA

Posted on: March 4th, 2025

Baraza la Madiwani katika Halmashauri ya Wilaya ya Missenyi leo tarehe 04 Machi, 2025 limeendelea na  ziara yake ya kikazi Mkoani Songwe katika Halmashauri ya Mji wa Tunduma.

Akizungumza wakati wa kuanza ziara hio mapema leo,  Mwenyekiti wa Halmashauri ya Wilaya ya Missenyi Mheshimiwa Projestus Tegamaisho amesema kwa siku ya jana walichotarajia kujifunza walikipata kwa asilimia 100 na matarajio ni kwamba katika Mji wa Tunduma watafanikiwa zaidi kwani mazingira yanafanana na Missenyi.

Aidha, Mheshimiwa Tegamaisho amebainisha kwamba wanatarajia  kupata uzoefu wa jinsia Halmashauri ya Mji wa Tunduma inavyonufaika na uwepo wa mpaka wa Tanzania na Zambia ambapo mazingira haya yanafanana na eneo la Mutukua katika mpaka wa Tanzania na Uganda. 

"Tutajifunza jinsi Halmashauri ya mji wa Tunduma inavyosimamia na kuendesha maegesho ya Malori ambapo mradi huu unafana na mradi wetu wa Maegesho ya Malori Mutukula ulioanza kufanya kazi kwa hatua za awali". Alisema Mhe. Tegamaisho .

Kwa upande wake Kaimu Mkurugenzi Mtendaji wa Halmashauri ya Wilaya ya Missenyi Bw. Egidius Kahendaguza alisema pia tunatarajia kujifunza namna Halmashauri  inavyokabiliana na ongezeko la watu mjini kwa kuhakikisha Mipango miji inaboreshwa ili tuweze kufanya maboresho ya Miji ya Kyaka, Bunazi na Mutukula.

"Tunataka kujifunza namna Halmashauri ya Mji wa Tunduma inavyoweza kufanikisha suala la upimaji wa viwanja na ukuzaji wa miji" alisema Bw. Kahendaguza.

Katika ziara hio Baraza la Madiwani la Halmashauri ya Wilaya ya Missenyi limetembelea kituo cha forodha kati ya Tanzania na Zambia.

Ziara hio itaendelea kesho katika Halmashauri ya Jiji la Mbeya.