BARAZA LA MADIWANI LAIDHINISHA BAJETI YA SHILINGI BILIONI 51.1 KWA MWAKA WA FEDHA 2025/26

Posted on: January 28th, 2025

Baraza la Madiwani katika Halmashauri ya Wilaya ya Missenyi leo tarehe 28 Januari 2025 limeanza Mkutano Maalum wa siku mbili kwa ajili ya kujadili na kuidhinisha Mpango wa maendeleo na Bajeti kwa Mwaka wa fedha 2025/2026.

Katika Mkutano huo jumla ya shilingi Bilioni 51.1 zimeidhimishwa kwa ajili ya Mpango wa maendeleo na bajeti kwa mwaka wa fedha 2025/26 ikiwa ni ongezeko la bilioni 9.5 sawa na asilimia 22.8 ya Mwaka wa fedha 2024/25 ambapo ilikua shilingi bilioni 41.6.

Akiwasilisha taarifa ya Mapitio Mkurugenzi Mtendaji wa Halmashauri ya Wilaya ya Missenyi Bw. John Paul Wanga alisema, katika kufanya Mapitio ya mapato ya ndani kwa kipindi cha miaka mitatu mfululizo, kwa mwaka wa fedha 2023/24 Halmashauri iliakisia kukusanya shilingi bilioni 5.3 na ikakusanya shilingi bilioni 8.2 sawa na aslimia 154 na mwaka huu wa fedha unaondelea 2024/25 maakisio yalikua bilioni 6.9 na mpaka kufikia nusu mwaka yaani Desemba 2024 makusanyo yalifikia bilioni 5.2 sawa na asilimia 76 na kwa mwaka ujao wa fedha 2025/26 maakisio ni shilingi bilioni 9.06 sawa na ongezeko la shilingi bilioni 2.1 sawa asilimia 23.

Kwa upande wake Mheshimiwa Projestus Tegamaisho ambaye ni Mwenyekiti wa Halmashauri alibainisha miradi ya kimkakati ambayo inatarajiwa kuongeza mapato ya Halmashauri katika Mwaka wa fedha 2025/26 ambayo ni pamoja na Mradi soko la ndizi linalo ambatana na Gulio katika kata ya Gera, Kufungua eneo la Sabasaba katika Kata Bugandika kwa ajili ya Soko maalum la ndizi aina ya Fia na kufanya shughuli za sabasaba na maadhimisho ya wiki ya Missenyi.

Mhe. Tegamaisho alisisitiza kwamba katika Kata ya Kakunyu kutafanyika uthamini na kulipa fidia ili kupanua eneo la mnada wa Lyabatura sambamba na kufungua Mnada wa Mbuzi na Gulio katika kijiji cha Bugango ambapo mkandarasi amepatikana na ataanza kazi mara moja.

"Katika Kata ya Mutukula tunataka kuweka shughuli za uchakataji wa mazao katika eneo la Kabakesa na Kujenga Mutukula Complex Park hivyo tutafanya upembuzi yakinifu ili kujua mahitaji halisi ya maeneo hayo" Alisema Mhe. Tegamaisho.

Hata hivyo aliongezea kwamba katika Kata ya Kashenye kutawekwa Mtambo wa kuzalisha Barafu katika Mwalo wa Kabindi, kuimarisha uzio wa Mwalo na kupanga eneo la Kabindi ili wajenge katika mipango miji.

"Katika Kata ya Kassambya ujenzi wa Soko la Bunazi umetengewa shilingi bilioni 1.7 na soko likikamilika litakalogharimu takribani shilingi bilioni 5 ambapo mpaka sasa tuna shilingi bilioni 1.7 kwa ajili ya kuanza ujenzi mwezi Machi 2025" Alisema Tegamaisho.

Alisisitiza kwamba katika maeneo ya Kata za Kassambya, Kyaka na Mutukula tumetenga fedha kwa ajili ya mpango Kabambe wa uendelezaji miji hio ili kuandaa maeneo hayo kuwa miji.

Maandalizi ya Uandaji wa Mpango na Bajeti kwa mwaka wa fedha 2025/26 umezingatia ilani ya Uchaguzi ya Mwaka wa fedha 2020/2025 ya Chama Cha Mapinduzi (CCM), Mwongozo wa Mpango na bajeti 2025/2026, Vipaumbele vya Halmashauri vilivyoibuliwa na wananchi, Mpango mkakati wa Halmashauri 2020/25, Maelekezo ya viongozi wa ngazi ya Kitaifa na Mkoa, Sera za Kisekta, Dira ya Maendeleo ya Taifa2025, Sheria ya Bajeti namba 11 ya mwaka 2015, Malengo ya maendeleo endelevu 2030 (SDG's), Agenda ya uboreshaji wa kilimo 10/30 na Mpango wa Kuandaa kesho ya vijana kupitia BBT.