Baraza la Madiwani lafanya ziara Ilemela

Posted on: May 10th, 2017

Baraza la Madiwani pamoja na Watendaji wa Halmashauri ya Misenyi wamefanya ziara ya mafunzo katika  Manispaa ya Ilemela,Mkoani Mwanza kujifunza namna Manispaa hiyo inavyotekeleza shughuli zake za kimaendeleo hasa katika masuala yanayohusu ukusanyaji wa mapato ya ndani,Utekelezaji wa miradi ya maendeleo pamoja na suala zima la  mipango miji.

Ziara hiyo imejumuisha Baraza la Madiwani  pamoja na Watendaji  wa Halmashauri hii wakiongozwa na Mheshimiwa Mwenyekiti wa Halmashauri hii Projestus Tegamaisho pamoja na Mkurugenzi Mtendaji Limbe Bernad Maurice ambapo mbali na kufurahishwa na mapokezi mazuri amesema kuwa lengo la ziara ni kujifunza namna Ilemela inavyofanya shughuli zake sambamba na kuimarisha uhusiano baina ya pande hizo mbili kwa lengo la kuboresha utoaji huduma na kuleta maendeleo huku wakitumia gharama nafuu

‘’tunashukuru kwa mapokezi mazuri na kutupatia ushirikiano mkubwa, nia ya ziara hii ni kujifunza namna mnavyotekeleza shughuli zenu za kimaendeleo hasa kwenye mapato, mipango miji, utekelezaji wa miradi ya maendeleo’’ alisema

Aidha ziara hiyo ilihusisha matembezi ya baadhi ya miradi inayotekelezwa na Ilemela ikiwemo mradi wa bweni la wasichana la shule ya sekondari Buswelu, mradi wa ujenzi wa madarasa ya shule ya msingi Buswelu na Mwalo wa soko la Kirumba ikitanguliwa na kikao cha pamoja cha Wataalamu na Waheshimiwa Madiwani wa pande zote mbili

Kwa upande wake mwakilishi wa Meya wa Manispaa Ilemela ambae pia ni Diwani wa Kata ya Buswelu Mheshimiwa Sarah Ng’wani ameshukuru kutembelewa na ugeni huo huku akitaka kuimarishwa kwa mahusiano ya pande hizo

‘’Ili tubadilishane mawazo wewe mwenzangu unafanyaje ni lazima tukae pamoja wataalamu wetu wamejipanga vizuri mjifunze na kupata picha halisi ya kinachotendeka ili kama kuna pahala mnakosea au tunakosea kwa pamoja tuweze kufanikisha’’ alisema

Akihitimisha Mkurugenzi Mtendaji wa Manispaa Ilemela John Wanga amezikaribisha pia manispaa nyengine kuja kujifunza na kuwahakikishia kuwa pamoja na upya wake Ilemela itaendelea kuwa manispaa ya mfano na kuigwa katika utekelezaji wa shughuli za kimaendeleo

‘’Ilemela ni manispaa mpya tunawakaribisha sana kujifunza iwe shughuli zetu za ndani au za nje’’ alisema